ANDING-ANDINGEN KALAK KARO

Keri-keri arang besi la tembe
Sibar ngasup enggo ikeriken, tapi sura-sura la seh. Umpama guna nekolahken anak, orang tua enggo tungtung kapur, lembu idayaken, sabah iputangken, tapi erkiteken anak la rate tutus, sekolahna la rasil.

Ngasuhi anak arimo, jukut nakanna
Ikuanken ku jelma si la terasuhi perbahan seh royalna, la meteh mehuli.

Bagi arimo tua-tua
Arimo tua-tua, janahna erdalan pe lit nge rusur sorana bagi sora kalak jungut-jungut.
Ikataken man jelma si mejungut, enggo me ia sinik nuate, jungut-jungut denga kang. .

Menang bas babah, talu bas perukuren
Ikuanken ku kalak si la lit pemetehna, tapi ngerana la nggit talu, ia tempa si beluhna. Gelah menang bas cakap, rugi pe ia nggit.
Ajar bancina
Ibas sada-sada pendahin entah pe sada-sada tempas kinigeluhen siakap kita la ngasup ije. Tapi adi reh maksa kecibalen, ngasup kang kepeken. Umpamana, sesekalak la akapna ia ngasup erdalan ndauh, tapi kenca terpaksa ngungsi, kukerangen pe ngasup ka nge erjujung.

Siagengen radu mbiring, sikuningen radu megersing
Antusenna, adi sician-cianen, sipecat-pecaten, pekepar rugi, pekepar mbau. Tapi adi siajar-ajaren, sisampat-sampaten, pekepar merim, pekepar menahang.
Adi pirah babi, enggo kenca man nadahken pelangkah
Ikataken man kalak si kenca elah man minter medem. Rimahna la isapuina lebe, janah perpangan ipediatna ampar.
Bagi baling-baling, ija nari angin rembus, kuje alakenna
Iandingken kukalak si la tetap rukur. Apai si mbelinna kuasana ikapitina. Rimbang ras temanna ka akapna dalih adi nguntungkenlah man bana.
Si des/seri : - Bagi sanggar uruk-uruk, kuja angin rembus kuje ia mbole.
Bagi si ngonggar batang buruk, adi nionggar getem si getemna, adi la nionggar macik si macikna
Kerna sada-sada tangekelen si serbut. Isingetken pe man teman erbanca ate morah ngenca, labo kena sampaten. Adi ierem-erem saja pe ibas ukur, ngalah ngukurisa.